"సారీ బుచ్చిబాబు"... 'పెద్ది' ట్రైలర్ పై చిరంజీవి మెగా రివ్యూ

గ్లోబల్ స్టార్ రామ్ చరణ్, దర్శకుడు బుచ్చిబాబు సానా కాంబినేషన్‌లో వస్తున్న 'పెద్ది' చిత్రంపై అంచనాలు భారీగా ఉన్నాయి. ఈ సినిమా ప్రమోషన్లలో భాగంగా మే 18న ట్రైలర్‌ను విడుదల చేయనున్నారు. అయితే, అధికారిక విడుదలకు ముందే మెగాస్టార్ చిరంజీవి ఈ ట్రైలర్‌ను వీక్షించి, తన స్పందనను సోషల్ మీడియా ద్వారా పంచుకున్నారు. తనదైన 'చిరులీక్స్' శైలిలో ఆయన చేసిన పోస్ట్ వైరల్ అవుతోంది.

"పెద్ది ట్రైలర్ చూశాను!! జస్ట్... వావ్! 3 నిమిషాల ప్యూర్‌ ఫైర్‌పవర్‌ ప్యాక్డ్‌ ట్రైలర్‌. చరణ్‌, బుచ్చి, రెహమాన్‌.. ఒక్కొక్కరు తమ బెస్ట్‌ ఇచ్చారు. కలిసి మాత్రం రఫ్ఫాడించేశారు! ఎంత ఊహించుకున్నా దాన్ని మించి ఉంటుంది ఈ ట్రైలర్. ఎమోషన్‌, ఎలివేషన్‌, మ్యాడ్‌నెస్‌ అన్నీ నెక్స్ట్‌ లెవల్‌లో ఉన్నాయి" అని చిరంజీవి ప్రశంసించారు.

అంతటితో ఆగకుండా, "చాలా రోజులయ్యింది మీకు #ChiruLeaks ఇచ్చి... 'మీరందరూ నేను ఆడానని అనుకుంటున్నారు... నేను పోరాడాను సారు...' సారీ బుచ్చి బాబు… చూశాక కంట్రోల్ తప్పా!" అంటూ సినిమాలోని ఓ పవర్‌ఫుల్ డైలాగ్‌ను లీక్ చేశారు. రూరల్ స్పోర్ట్స్ యాక్షన్ డ్రామాగా తెరకెక్కుతున్న ఈ చిత్రం జూన్ 4న ప్రపంచవ్యాప్తంగా విడుదల కానుంది. చిరంజీవి ఇచ్చిన ఈ లీక్‌తో ట్రైలర్‌పై అంచనాలు మరింత పెరిగాయి.